出名情路崎嶇的阿G.E.M鄧紫棋，當年同林宥嘉分手，驚爆第三者風波，更觸發雙方隔空罵戰，鬧出連串是非！不過正所謂舊嘅唔去、新嘅點嚟？阿G.E.M於去年戀上造型師阿Mark，兩人更被發現十指緊扣同遊日本，不過阿G.E.M就堅決否認戀情，其後雖然佢哋經常出雙入對，但由於阿Mark是阿G.E.M的造型師，所以一直以「工作」做掩護，令戀情始終撲朔迷離。
「唔到結婚嗰日，我唔會講感情狀況！」
直至近日阿G.E.M勇闖NASA位於矽谷的Ames研究中心，參與有科學界奧斯卡之稱的「科學突破獎」頒獎典禮，身為造型師的阿Mark理所當然亦有同行，而不斷分享今次宇宙之旅的G.E.M，更突然於IG首度大晒與阿Mark的合照，只見阿Mark輕攬阿G.E.M的纖腰，一切盡在不言中。張相一出，即時掀起網民哄動，唔止有成13萬個like，由於阿G.E.M之前被傳媒追問戀情時，曾拋下一句：「唔到結婚嗰日，我唔會講感情狀況！」故此阿G.E.M今次忽然高調宣示戀情，惹來網民無限揣測：「佢講過話唔到結婚，唔會講感情，今次咁晒相法，即係宣布結婚？」「有名妳叫宇宙G.E.M，條仔喺NASA求婚，阿G.E.M實應承啦！」雖然阿G.E.M只係得27歲，但其實佢一直有顆恨嫁的心：「以前好天真，想22歲結婚，後來又想25歲，可惜得個想字，依家唔想太多了，有人求婚都會認真考慮。」若然今次成功登陸NASA之餘，仲能夠覓得好歸宿，咁就名副其實雙喜臨門喇！