2012年港姐冠軍張名雅自從下嫁富貴律師蔡錦豪後，成功兩年抱兩，繼去年誕下寶貝仔Mario後，如今又再懷孕，預產期是今年12月，閒時張名雅仲不時同老公四圍飛過優質生活，真係羨煞旁人。雖然貴為闊太，不過張名雅都好貼地架，最近仲喺ig上載搭港鐵嘅相，不過就竟然鬧出連串是非，事關有網民質疑佢點解有車唔揸，大住肚都走去搭港鐵，好似要逼人讓座咁，激到張名雅變咗嬲嬲豬，撰文發表讓座論反擊：「敬老扶弱對我來講係基本亦希望承傳給下一代，好多人有心人會選擇讓座（而你讓座人哋拒絕你又係另一回事），但有小部分人見到老人家、小朋友或大肚婆你真係會擰開望第二邊，時運高睇你唔到！作為港人好想出句聲，讓座給有需要嘅人不是必然，讓座是一種美德，是內涵同個人修養。」
估唔到呢篇文章一出，竟然激起部份網民更強烈反彈，「你老公係律師，你又就生得，如果真係無人讓座，真係會有危險，點解要去搏先？」「大肚大晒咩！下次你咪著三點式坐囉，實有人發現你，讓座畀你。」「你搭個陣有無出聲叫人讓先，你唔講點知需要讓？」不過亦有網民大讚張名雅敢言：「乜嘢讓座，關愛座呢啲問題，一講就肯定實有人鬧，我佩服張名雅咁夠膽。」亦有媽咪級網民顯得好感觸：「大住個肚坐港鐵真係好辛苦，不過真係有好多人係唔會讓。」