英國萬人迷碧咸，唔止靚仔有型，仲用情專一，1999年同Victoria結婚後，就幾乎與一切緋聞絕緣，婚後兩人育有三子一女，雖然人前人後不時表現恩愛，但最近卻突然傳出婚變消息，事關外國傳媒發現Victoria無陪老公一齊慶祝奶奶生日，不過講真Victoria本身咁忙，抽唔到時間有乜出奇，令婚變可信度存疑，弊在近日碧咸接受訪問時竟然對婚姻大吐苦水：「當你結婚有一段時間，像我們一樣，那就會變成一份苦差。」苦差論一出即時惹來各界嘩然，有指Victoria認為老公咁講等於公開落自己面，一度為呢件事哭成淚人，而其後碧咸又被發現撇低Victoria，同友人結伴夜蒲，有傳同行仲有一名神秘女子，令婚變傳聞疑幻似真。
不過傳聞歸傳聞，近日碧咸舉家去澳洲開心享天倫，更被網民於悉尼街頭野生捕獲，表面看似一切雨過天青，但就有眼利網民質疑，佢哋兩公婆唔止前後分開行，而且兩個人面色都唔太好，尤其碧咸個樣眉頭深鎖好愁吓，「唔理內情係點都好，Victoria一直咁努力做賢妻良母，但碧咸居然講成係苦差，唔嬲就假，難怪碧咸個樣咁愁。」「今次似箍煲之旅多啲，希望Victoria快啲原諒碧咸啦！」其後碧咸於ig上載多張家庭照，但就係唔見Victoria蹤影，睇怕今次婚變傳聞應該仲有排「傳」喎！