要數近期娛樂圈最受歡迎的星二代，陳小春與應采兒的5歲寶貝仔小小春Jasper肯定上榜，事關他們自從參與內地節目《爸爸去哪兒5》後，憑有趣的父子活動，加上Jasper的萌爆表現，成功俘虜萬千粉絲嘅心。Jasper唔止遺傳晒小春嘅基因，生到成個餅印兼有演藝天份，估唔到連寫字都學足老竇，最近Jasper學寫爸爸同自己個名，點知就將陳小春同小小春個「小」字都掉轉咗寫，佢嘅大作一出即時獲網民大讚可愛，不過就有超細心嘅網民發現，原來Jasper個「小」字係學老竇架，事關小春當年拍TVB的《鹿鼎記》時，就同樣將「小」掉轉咗寫，網民仲cap晒圖同大家開心share添。
講真呢對娛圈父子檔近年人氣可謂爆晒燈，尤其係Jasper，當日於《爸爸去哪兒5》中，當小春因為佢行得慢發晒脾氣之際，Jasper一句：「Can you stop angry now！」唔止贏盡觀眾讚賞，就連小春都話囝囝嘅反應令佢覺得好震撼，直頭好似當頭棒喝。其後小春更食住個勢舉行名為「Stop Angry」內地巡迴演唱會，而來到拍《爸爸去哪兒6》，有指其父子身價由上輯2500萬人仔加碼至3500萬。雖然Jasper如今人氣直迫自己，不過小春就表明唔希望阿仔入行：「有咁多人鍾意我嘅兒子，我當然開心，但講到如果要畀佢入娛樂圈，我就堅決反對。」事關小春覺得對小朋友來說，現階段都是學業為重呀！