隨著苟芸慧出嫁，昔日的「處女黨」如今已變成幸福人妻，當中一早覓得如意郎君強強的岑麗香，早前更宣布離開TVB，由於之前香香多次表示希望努力造人，令外界誤以為她會減產，將重心放在家庭上。誰知呢位人妻婚後仲搏命，最近更性感上陣拍廣告，於網上引起哄動。
事關香香於廣告中以性感上陣大騷香肩，本來衣著都未算過火，但鏡頭卻刻意close-up營造半裸效果，加上不時與男伴頭貼頭互動，氣氛火辣，而最令人想入非非的是，香香不斷擺出誘惑神情，表情之豐富直頭夠晒資格爭視后，去到差唔多結尾，香香仲話：「我鍾意佢畀我全身嘅貼身享受，一次點會夠，唔好畀佢走！」香香貴為唔少宅男心目中嘅女神，今次玩到咁激當然令唔少網民睇到哇哇聲，有人仲以為佢係咪拍緊安全套廣告：「睇見香香公主啲神情對白，我最初真係奇怪點解佢會拍安全套廣告？真係好sexy！」「呢個廣告拍得香香好靚，雖然可能有少少過火，但多人講就證明成功。」
其實今次香香絕對唔係拍安全套廣告，而係sell按摩椅至真，係咪好有創意先？