「鐵人」都會有病倒嘅一日，近年余文樂工作排到密密麻麻，電影、廣告幾乎一部接一部，加上今年中榮升父親後，工作、湊仔兩邊忙，結果本月初樂仔於日本突然入院，並上載手臂插着吊鹽水膠喉的照片，由於樂仔身體一向健康兼經常做GYM，故當時外界估計佢可能只係食咗有問題嘅魚生。但事隔短短半個月，樂仔突然於ig報憂：「可能過去十幾年來實在面對太多壓力連自己都不知道，最近身體真係好差好差，經歷緊人生從未試過的事，希望一切安好可以平安無事🙏🏼」更上載了一張漆黑夜空的照片宣洩心情。
由於樂仔並非喜歡無病呻吟、自製新聞之人，但他竟然用上「經歷緊人生從未試過的事」，形容現在情況，加上一張望落唔止灰、直頭黑到爆嘅漆黑夜空相，種種跡象都顯示今次樂仔面對的問題絕非小兒科，難怪留言一出，即時傳言四起，甚至有人擔心樂仔可能患上重病：「樂仔不嬲都好少講私事，但今次佢話經歷緊人生從未試過的事，希望一切平安無事，咁睇嚟呢個病肯定唔係普通傷風感冒。」亦有網民希望樂仔唔好再太操勞：「錢係賺唔晒，樂仔你要好好休息，唔好令大家擔心你。」無論樂仔面對幾大難關都好，相信大家都希望他能早日痊癒，繼續開心做廿四孝老竇。