雖然江若琳與蕭潤邦12月23號先正式拉埋天窗，不過呢位準蕭太已經不時喺網上大晒幸福，將蕭生種種愛妻號行為公諸於世，港女睇到既羨且妒，仲封佢做完美老公，力數蕭生五大絕世優點。
驚喜婚禮新娘大晒
一講到籌備婚禮，唔少新人都嗌晒救命，甚至搞到成日嘈交，咁大家就要學吓蕭潤邦點玩喇，唔止一手包辦婚禮，江若琳仲有最終話事權，即係新娘唔滿意，就要重新搞過，雖然難度咁高，但蕭生一啲都未驚過：「其實我都不時會問Elanne鍾意啲乜，但佢每日都改變緊，所以依家問定都係搜集資料，可能到11月先至落實。」
閒話一句即刻做
好多時大家都會投訴另一半無心肝，自己講完嘅嘢，佢永遠唔記得，之後做錯仲永遠扮無辜！不過呢樣絕對唔會出現喺蕭潤邦身上，江若琳近日就喺ig甜到漏咁話：「我喺布吉嘅時候提過話想換枝電動牙刷，番到嚟就即刻去咗買。」閒話一句即做，蕭生，使唔使咁勤力呀？
愛屋及烏去旅行
同外父外母去旅行，相信唔少男士都會覺得可免則免，費事有拗撬搞到唔開心，不過蕭潤邦就無有怕，因為江若琳一句：「如果人生有機會帶埋爸爸媽媽一齊嚟（布吉）玩，佢哋都一定會好難忘。」蕭生即時炮製驚喜之旅，請埋江爸爸江媽媽去布吉，咁識做，難怪佢哋咁放心畀個女嫁你啦！
踎低影相唔頭暈
生得高大威猛，對男士嚟講可能係優點，但對蕭潤邦嚟講竟然變成缺點，事關蕭生足足高Elanne成個頭，女士們諗吓由佢揸機影相，出嚟會變成點？所以江若琳就下咗道聖旨：「佢本身太高點樣影我都好矮，𠵱家佢影相我會叫佢踎低。」而蕭生最高紀錄係喺泳池足足踎咗成個鐘幫Elanne影泳衣相，問你服未？
打本百萬做生意
貴為「生煎包王子」，蕭潤邦的身家當然有番咁上下，而當江若琳話想搞生意開麵店，佢即刻打本百萬開舖，仲事事親力親為幫手打點，而講到係咪送間麵店畀
Elanne，蕭生仲趁機發表愛的宣言：「唔好話送定唔係送，佢同我都冇分你我。」