點解次次朝早返工先嚟出事？唔通連個天都唔鍾意我哋？今早港鐵又再發生故障，仲要觀塘線、荃灣線、港島線同將軍澳線一齊出事，逼大家改搭巴士、小巴、渡輪，結果搞到火燒連環船，乜都塞到爆晒，隨時行路都快過搭車呀！
而除咗一般打工仔受苦，估唔到貴為網台老闆嘅杜汶澤都中招，記得之前颱風山竹襲港，當時佢好豪氣咁宣布公司停工，仲話返工即炒！不過今次可能由於公司真係有緊急嘢處理，所以佢自己都逼住要喺繁忙時間返工，雖然阿澤已經唔搭港鐵、自己揸車，但一出到吐露港，佢都忍唔住喺fb post相兼留言話：「塞港鐵塞到上吐露港」有網民好奇問阿澤做乜返工時間返工，佢終於忍唔住爆粗回應：「係窮啊⋯⋯Dxxx」睇嚟今次港鐵故障，真係激到阿澤火都嚟。
森美：港人真係好鍾意返工
雖然今次阿澤講出唔少打工仔嘅心聲，不過又唔係個個藝人都咁貼地嘅，好似森美今朝喺電台開咪，就話因為港鐵故障，搞到囡囡被困太子站，唯有揸車載阿女去中環返學，當佢睇見港鐵站內嘅情況，佢竟然話：「港人真係好鍾意返工返學，咁辛苦都要返，顯示出拼搏精神。」
森美言論一出，即時惹嚟唔少網民批評，炮轟佢抽水都搵第二樣：「可能佢自己真係覺得好好笑，不過對於我哋呢啲困獸鬥咗幾個鐘嘅人嚟講，真係笑唔出囉！」「大佬！要搵食架！你試吓同老細講港鐵壞咗唔返工，睇吓會有乜嘢後果？」