成日聽人講娛樂圈多鬼怪嘢，尤其係喺TVB電視城，從廣播道到清水灣以至今日嘅將軍澳工業村，鬧鬼傳聞簡直多不勝數，而曾經貴為TVB當家小生的林家棟，最近亮相ViuTV節目《大星講》，憶述當年拍成名作《大鬧廣昌隆》，不禁高呼好邪：「個時第一次做男主角，好驚架，仲要拍住一姐海味（周海媚），一姐喎，成個過程都好戰戰兢兢，但最好笑嘅係（公司）要睇我生辰八字，我問點解咁好笑要睇我嘅生辰八字？原來拍《大鬧廣昌隆》，那怕你係粵劇、電視劇都一定要用新人，呢套戲好邪！」主持陶傑更補充指：「呢種戲如果搵舊人做，唔止票房（收視）仆，編（劇）、導（演）、演（員）仲可能死於非命，所以你（家棟）咪避到囉！有啲戲真係好邪！」
有指是當年位於廣州的廣昌隆。
廣昌隆女鬼報仇殺負心郎
其實又難怪當年TVB咁緊張嘅，事關有指《大鬧廣昌隆》是改編自發生於清末廣州的真人真事，話說當時有一位妓女因厭倦賣笑生涯決心從良，於客人中覓得一位如意郎君，誰知此人只是貪圖她的財產，根本沒有迎娶之心，某晚兩人前往旅店投宿，負心郎趁機謀財害命。其後負心郎開設雜貨店廣昌隆，亦有另一版本指他本身是廣昌隆太子爺，而妓女則死不瞑目化身厲鬼想報仇，但由於廣昌隆門前有地主，她無法進入，只能藏身於死去的房間，幸而之後有一位小販故友投宿，女鬼向他訴說冤情，小販初時被嚇得魂飛魄散，但後來產生同情心，決定助女鬼報仇。女鬼依附於雨傘之中，叮囑小販沿途切勿打開雨傘，並不斷低聲呼叫其名字，最終女鬼成功進入廣昌隆報仇雪恨。
分享離巢因由暗斥TVB
而家棟除了分享被查生辰八字的古怪事，又坦言當年能與多位前輩合作令他獲益良多，當中最佩服萬梓良：「記得1994年同佢拍《萬里長情》，我哋去馬來西亞拍外景，佢投入到自己搵sponsor，個陣去到馬來西亞call唔到槍，母校(TVB)都call唔到槍，佢搵返佢嘅母校ATV嘅舊同事班啲槍返嚟拍個場戲，我心諗萬子哥咁投入嘅，OK喎，睇到佢係點樣做人，點樣做事。」
其後家棟以主角身份一劇接一劇，幾乎套套劇都創收視佳績，但他毅然於事業巔峰之際離巢，原因是頂TVB唔順：「你一年拍咗130幾集電視劇，都係嗰啲，要符合家庭觀眾要求，我覺得需要改變，再係咁做會死，我仲記得拍完《娛樂插班生》，佢再整套《樂壇插班生》，當拍完 《茶是故鄉濃》，又整套《酒是故鄉醇》，想點呀究竟？即係等於依家拍戲，你話觀眾意啲乜，但你可以影響觀眾架嘛。」
離巢後，家棟遇上另一伯樂劉德華：「喺公司12年，主力做監製工作，希望試唔同嘅嘢，（點解劉德華咁信你） 因為我戇居啩，不過其實只係得信同唔信，如果你唔信，唔信我啲乜嘢呢？當然我相信唔單單止因為我哋嘅友誼，佢亦知道我多年嚟點樣做人、點樣做事。」