范冰冰的逃稅風波堪稱本周超級熱話,無論娛樂、港聞以至財經版都見到范爺蹤影,可見范爺人氣有幾勁!TVB當然唔會放過呢個黃金機會,星期三(3日)內地一有判刑,翌日翡翠台便於朝早10點半重播范爺經典作《武則天》,雖然唔知係TVB悉心安排抑或純屬巧合,但重播消息一出,唔少網民都大讚TVB反應快,絕對係神助攻。
網民:「TVB呢個無敵抽,簡直係神助攻,依家冰冰咁嘅環境,武則天分分鐘係佢收山作,一定要早啲起身捧場。」
網民:「重播好嘢係好事,但係咪播原裝版本先?我唔想睇封胸版喎!」
2015收視冠軍
由范冰冰擔任老闆兼主角的《武則天》,製作費高達三億人民幣,但於內地播放期間,因一眾女演員的服飾過於暴露,而遭停播四日,之後製作單位以後期加工變成封胸版,才得以復播,雖然鬧出不少是非,但仍無損其收視,更成為首部於網上播放率超過一百億的電視劇。TVB買下版權後於翡翠台播出,平均收視33點,最高收視更高達37點,成為2015年收視冠軍,論人氣與口牌絕對不輸今日的《延禧攻略》。