成日聽人講「賢內助」，一個好老婆真係可以幫到唔少忙架！好似最近陳豪忙於拍劇，少曝光自然少新聞，不過好彩佢有個好老婆陳茵媺。事緣最近陳豪到台灣拍劇，同老婆分隔異地，搞到陳茵媺飽受相思之苦，唯有望相止渴，佢仲同大家開心share，喺IG上載陳豪孭住一對仔女嘅相片，只見man爆嘅陳豪完全唔覺辛苦兼笑到四萬咁口，果然不愧為圈中超級廿四孝老竇，張相一出唔止贏得過萬個Like，陳茵媺仲獲封為最強公關，有網民讚佢如果唔拍戲，都可以開公關公司，分分鐘仲有錢途呀！
月租七萬 為仔女搬屋
其實多年來陳豪為咗三個寶貝仔女真係費盡心思，之前就每日花幾個鐘車出車入，由大埔來回港島接仔女返放學，由於三個仔女都讀唔同學校，即係每日要走六轉，由於實在太辛苦，最近陳豪索性搬屋，月租七萬進駐南灣豪宅，不過陳豪解釋所謂辛苦，唔係怕自己辛苦，而係擔心仔女：「錢唔係問題，時間係金錢，最緊要係小朋友有時間學習。」看來大家想學陳豪做慈父，除了要有健碩body，還要有豐厚嘅荷包。