每次開騷都一票難求兼成為黃牛黨目標的陳奕迅，宣布下月27日於中環摩天輪舉行只演一場的慈善音樂會，門票不會公開發售，Eason解釋之所以開騷，全因要兌現承諾：「我之前話過要回饋香港，所以唔會賣飛，唔想講錢，總之做得開心就無問題。」他又透露屆時會邀請慈善機構的受惠者睇騷，對象全部是年青人。
笑談噪音問題
其實於中環摩天輪開騷絕非新鮮事，不過當年黎明開騷就因為噪音問題引發災難，不過Eason顯然未驚過：「今次我喺核心外圍開騷，不過內圍同外圍啲嘢，要問吓明福俠先得。（夠唔夠膽唱大聲啲？）呢個要睇點樣控制音樂同分貝，到時要互相協調。」
黎明化解關公災難
人人都喺紅館開騷，唔通個個都真係想喺紅館開騷咩！黎明於2016年就告別紅館於中環海濱摩天輪舉行音樂會，但開騷當日因為帳篷物料不符合規格，被逼臨時取消，引起大批已經到場的歌迷不滿，幸而黎明處變不驚，親自於facebook交待事件，更承擔一切責任，獲外界一致激讚，成功化解危機。之後主辦單位清拆帳篷順利開騷，而因為沒有帳篷阻隔，吸引大批市民到核心外圍欣賞免費騷，場面儼如嘉年華。
#陳奕迅 #黎明 #災難