要數睇戲無品行為，大聲討論劇情、大笑亂叫一定榜上有名，昨晚有網民於討論區投訴，指睇鬼片時有「00後」中學生「扮鬼叫」、「嘈足全場」惹起公憤，將其拍照放上網公審，網民旋即將該批學生「起底」，並發信校方要求處分。
事源該名網民昨午於九龍灣淘大商場的戲院觀賞《詭修女》期間，前排一群中學生不斷製造噪音，又會無故呻吟，他形容：「已經分唔清楚係鬼叫定人叫！」。同場有觀眾不堪滋擾，不時擰轉頭怒目而視，以示不忿，甚至開口要求他們安靜，惟對方毫不收斂，反而變本加厲，每逢劇情到緊張關頭，該班中學生便突然扮鬼叫，令前排觀眾大吃一驚，不禁斥責他們「黐線」。
其後他們終於停止叫喊，可是事件未完，當到全套劇最關鍵部份，他們竟然哈哈大笑直至電影播放完畢，笑聲完全覆蓋高潮位的打鬥聲，嚴重破壞電影氣氛，遭在場觀眾無不圓睜兩眼瞪視，他們隨即急步離開。
一場好戲被滋事學生破壞，事主形容：「完全未試過睇場戲咁火滾，比人騷擾到唔知睇左啲咩，好似由鬼片變左做笑片咁！究竟咩中學有埋啲咁垃圾學生！真係唔可以助長啲咁嘅風氣，你估咁樣騷擾人好好玩呢？諗住拍拍屎忽走左當冇事發生？」
不少網民為事主感不值，留言：「我都好憎呢啲人，唔嚇得就咪入場睇啦」、「應該要立例阻晒呢類人入戲院睇戲，想安靜睇場戲都咁難，講少一陣野會口臭咩」、「啲中學生以為自己好型好威，講嘢大大聲做attention seeker」等等表達不滿。
涉事的中學生其後遭網民「起底」公審，成功找出其所屬學校，發信要求校方作出合理解釋及予以懲罰，冀校方盡快處理並公開道歉，並提醒學生事件的嚴重性，認為假若不了了之，便會影響學校聲譽及風氣。
其實任何一間戲院都設有院內守則，講明電影播放期間，觀眾應避免製造不必要的聲響或作出任何影響或阻礙其他觀眾觀賞電影之行為。雖然現在未有任何法例管制睇戲時的聲浪或任何滋擾行為，但作為一個有品的觀眾有責任及義務遵守規矩、自制並尊重其他觀眾，不要做個討人厭的人，為他人帶來不便。