陳浩民有女萬事足

陳浩民之前帶埋老婆同寶貝囡囡陳雅薷見傳媒朋友，順便慶祝個女100日。呢位小千金人仔細細已經成為大眾嘅親善大使，因為佢好乖好抵錫，啲傳媒姐姐爭住抱佢，即使逐個過手抱，佢都冇異議，畀人撩仲卡卡笑，搞到啲姐姐暈晒大浪。

唔知係咪玩得太開心，佢突然靜止咗一陣，原來佢喺度「便便」；於是媽咪同工人一齊幫手換片片，而家啲BB真係精靈到痹。據媽咪蔣麗莎講，囡囡咁細個已經不停搭飛機，因為佢坐完月就抱住個女去橫店探老公班，來來回回都好幾次。之前一家三口兼雙方家長一齊去峇里島暢遊，玩得好開心。

睇見陳浩民一副有女萬事足個樣，希望呢位小千金能箍緊爸爸的心，令已為人父嘅陳浩民更珍惜天倫之樂。(本欄逢周三刊登)