袋穩3大錦囊 投資無往不利

唔經唔覺2023年已經嚟到第3季，曉陽都唔經唔覺喺《晴報》寫咗幾年專欄。回顧呢幾年，其實都分享咗唔少投資理財嘅諗法，獨到見解或者經驗之談就絕對稱唔上，但都係一啲自己嘅經歷，以及同事朋友之間嘅經歷，主要希望畀讀者了解更多，喺理財方面思考一下方向。

話說收到《晴報》即將結束印刷版嘅消息時，確實非常震驚，因為印象中嘅《晴報》內容不但健康，而且充滿正能量，一份如此出色嘅報章結果都係不敵時代洪流，的確非常非常可惜。但天下無不散之筵席，今日將會係曉陽最後一次同讀者見面，無任何臨別贈言，只有幾個關於理財嘅想法，想再同讀者分享下。

首先係堅持，無論投資任何產品，如果覺得有長遠價值，一定要堅持，唔好因為中途賺咗錢就離場，否則可能會少賺好多；其次，唔好信任何所謂必勝貼士，好多小道消息，其實都係背後好多有心人放出嚟，幾多真幾多假，普通投資者唔會分辨到，所以作為小投資者，最緊要堅持買正路嘅產品，最安全；最後一點，就係及早行動，好多朋友都同曉陽講，可惜後生嘅時候無開始投資，到咗30至40歲先開始，結果就遲咗，變相滾存資產嘅時間少咗。

希望各位讀者喺未來日子都一帆風順，理財投資都可以順順利利，有緣再會。