銀債解凍資金5種出路

早前政府推出嘅最新一批銀色債券分配結果出爐，認購22手或以下嘅投資者全部都獲分派，約9萬份申請可獲派23手。今次銀債獲逾710億元認購金額，實際發行額為550億元，意味有超過160億元解凍資金。

解凍後有咩出路？朋友Leo話佢爸爸剛好派足22手，仲有錢剩低，問曉陽點處理好。曉陽就向佢介紹5種風險唔同嘅產品。

第一種當然係定存，同銀債一樣，風險唔高，適合保守嘅投資者，近日港元定期存款衝上5厘高息，有解凍資金嘅朋友不妨考慮。

第二樣同樣風險唔算高嘅係美國國債。由於美國7月份零售數據激增，美國國債孳息率急升，短期回報全綫高於5厘。但坊間一直相信美國係全球最大嘅經濟體，倒閉破產機會甚低，故美國國債一般被認定係「全球最安全」、「絕不違約」嘅國家債券。

至於風險稍高嘅，就有高息ETF同高息基金。前者適合唔想買個股，但又想買股票嘅投資者，ETF就偏向分散股票投資風險；至於後者，主要分散投資喺債券、股票同貨幣市場工具等唔同資產類別嘅產品，風險會相對更低一啲。

最後，當然唔可以唔提高息股。近日唔少藍籌股股價回調，推高股息率。但唔好唔記得，股息率高，全因股價跌，而即使依家買，去到派息，都係要除淨，股價一樣會打折扣，加上可能賺息蝕價，呢個風險不得不防。

（本欄逢周四刊登）