人生「覆盤」成功的棋王

上一篇文講到，當我睇到呢班喺「香港學生輔助會」寄宿成長嘅年輕人，帶住熱誠為我哋晚宴序幕表演唱歌時，唔知點解，我竟然流眼淚。

來自破碎家庭或被虐待嘅孩子，喺佢哋嘅成長路上，當得不到關愛及照顧，缺少安全感，便會陷入孤獨甚至自閉，亦容易成為不良少年或不良少女，容易行差踏錯。所以當我見到呢班年輕人散發出正能量時，我真係好感動。

正如佢哋嘅師兄、本港頂尖中國象棋棋手兼十大傑出青年周世傑，童年時佢同姐姐喺家暴中成長，無論心靈或肉體上都受到好大傷害。10歲時，社工認為佢哋嘅家庭環境不宜居住，於是安排佢同姐姐入住「香港兒童安置所」。

喺入住安置所期間，宿舍有一位夜更管理員，喺自由時間時會同宿生下棋。世傑喺旁邊睇，初時覺得棋來棋往，一點都睇唔明白。管理員見佢睇得咁認真，於是開始指導佢，就係因為咁，不經意成為咗周世傑嘅人生啟蒙老師。

因為年輕時周世傑不擅交際嘅性格，加上喺欠缺關愛嘅環境成長，童年生活並不愉快，思想亦偏激。喺離開兒童院後，佢一度誤入歧途，中三輟學後加入黑社會，甚至沉淪毒海，直至23歲時毒品令健康變差，經濟出現困難，佢先開始反思自我。佢形容自己嘅人生似棋局「覆盤」，而象棋更成為佢人生重新出發嘅關鍵！

有幾多年輕人可以好似周世咁能夠「覆盤」？你願意為呢班不幸嘅年輕朋友獻上關懷同支持，等佢哋喺泥坑中都能夠堅強咁茁壯成長，成為我哋未來嘅棟樑嗎？（本欄逢周四刊登）