夢境疑幻似真

我係一個好鍾意發夢嘅人，發好夢會笑出聲，發噩夢會喊醒。我好相信夢帶畀我嘅啟示。記得選香港小姐初賽前一晚，發夢喺舞台上有好靚嘅光綫照射住我，好開心，結果嗰晚比賽我攞咗最上鏡小姐；嗰個感覺同夢中一樣，美麗又開心。

1991年我發咗個牙齒掉落嘅夢，夢醒後唔知點解我好驚同埋好傷心，周圍問人發夢甩牙係點解？古書有明確指出掉牙乃象徵「家有喪事」，夢見自己掉牙係噩運預兆，書中解釋，因為牙係露喺外面嘅骨骼組織，掉牙意味住「骨肉分離」。結果嗰年我爸爸真係離開咗呢個世界。

夢真係好神奇，喺現實未得到或者有機會永遠得不到嘅事，喺夢中都可以發生。而家我最開心嘅，就係爸爸媽媽好多時會喺夢入面同我相聚，感覺佢哋依然時刻喺我身邊，幸福依然。

我好鍾意研究夢，有好多關於夢嘅書，其中一本《解夢大師》，佢將時間軸嘅概念設定喺夢境中，認為夢境係人類穿越嘅媒介。夢境係人都有，就算動物都有，我見到我隻狗都會發開口夢，兼手腳爬爬，好鬼得意。

夢境真係疑幻似真，你有無試過，夢醒時仲以為自己依然留喺夢境裏面，沉澱喺夢入面嘅情緒？我時常發生呢個情況，所以發咩嘢夢，真係好影響到我。正如佛洛伊德講過，夢境其實係關於人嘅潛意識，亦透露出對自己現實中，好多已知或未知嘅事情或隱喻。可以好似電影《Inception》（潛行凶間），主角利用潛意識夢境完成不可能嘅任務，我就當然無佢咁叻，但至少我盡量唔會帶住困擾上床。

臨瞓前，睇啲溫馨嘅戲或者聽輕鬆嘅音樂，都可以幫助自己發好夢㗎。

（本欄逢周四刊登）