「愛互送」籲買飯券贈基層 「餐餐送愛」募捐 近220食肆響應

第5波疫情重挫各行各業，基層生計亦大受影響，但黛安聽聞，部分餐廳喺疫境下仍堅持向基層免費派飯。最近新世界發展策動嘅大型捐贈配對平台「Share for Good愛互送」發起「Show me your love飯」義賣行動，呼籲公眾支持7間疫境派飯嘅餐廳，包括千樂燒味餐室、好運燒臘飯店、花月宮、金佛園素食、Manna‧嗎哪、廚尊及華姐清湯腩，向佢哋買飯券轉贈基層。新世界集團慈善基金會已率先向7間餐廳，每間買咗1,000份飯以示支持。

義賣行動為期1個月，參與嘅餐廳將會喺店內展示「愛互送」平台提供嘅海報及卡紙。有意捐助嘅人，光顧堂食或外賣後，可到收銀處購買飯券，每買1張等於贊助1個飯盒，價錢以飯盒成本去釐定，介乎$30至$60。

此外，「愛互送」下月將推出大型捐贈計劃「Share a Meal餐餐送愛」，全港近220間食肆響應參與，大家可以喺餐廳「食1餐捐1次」，善款將用作購買食品等物資，為基層送暖。參與食肆名單可【按此】瀏覽。