FOOD-CO賀年食品大募集 與基層分享新年喜悅

相信大家過年會買唔少賀年禮品及食品，黛安知道，由聖雅各福群會成立嘅FOOD-CO，即日起至2月11日，會推出「賀年食品及乾糧收集行動」，喺領展旗下22個商場及各區設立共42個收集點，其中包括該會位於灣仔及石硤尾嘅辦事處，及其他屋苑、公司等收集點，方便更多熱心市民能參與捐贈。大家可以捐出食用限期唔少於8個星期嘅賀年禮盒等包裝食品，透過「惜食共享」，令基層市民分享到新年喜悅。

黛安聽聞，佢哋近日已獲一間企業捐贈300底蘿蔔糕，新年前會陸續送抵。聖雅各福群會扶貧服務高級經理吳雯賢話，無論捐贈數量多少都係一份心意，佢哋會先檢查收集到嘅食品包裝有無破損，確保食物安全同衞生，整理後會喺FOOD-CO手機程式發出通知，盡快將食品送到有需要嘅基層家庭手上。

公關姊妹話，FOOD-CO截至去年12月，透過平台進行嘅食物捐贈交易累計接近8,700次，涉及超過1千多萬份餐，逾3萬人受惠。