華懋年花市場 助花農渡難關

今年年宵花市因疫情而取消，花農同市民都好頭痕，黛安收到風，華懋集團將會喺旗下如心廣場同翩滙坊，及近期潮人必去嘅中環街市，以至荃灣西如心酒店推出期間限定嘅「百花齊放年花市場」。中環街市嘅花市已得到本地農業小商戶「尚禮坊」、「生生園」同「花花世界」參與，即日起提供多款本地新鮮蘭花、桃花、水仙同多種應節花卉畀市民選購。

華懋執董兼地產業務董事總經理區慶麟同黛安講，集團向來關心社區，一直為社會有需要社群提供支援，希望今次提供場地可助花農渡過難關，避免佢哋心血付諸流水，同時紓緩花墟人群聚集，認真有心。

公關姊妹話，年花市場會嚴格遵守防疫措施及規例，亦會派人手控制人流，保障大家嘅健康同安全，有興趣參與嘅花農，可以致電25007168查詢。