《中環夏誌》6.26開鑼 《莫奈花園》常駐中環海濱

夏日炎炎，暑假又無得外遊，長達個多月嘅《中環夏誌》就係最佳節目，今個月26日就喺中環海濱活動空間開鑼喇！3項常駐裝置包括《莫奈花園》、《SUMMOJI夏日想》同《光影迷宮》會率先登場，勢成打卡熱點，最緊要全部都係免費入場呀。

黛安最感興趣嘅係《莫奈花園》，因設計氛圍係莫奈作品啟發，仲有4米高嘅巨型LED屏幕，展出大師故居同名畫《睡蓮》等，技癢人士仲可以即席揮筆作畫，現場仲有攤位活動同工作坊，畀大家一齊喺維港前Art Jamming，聽落都覺得好玩。另外，由居港法籍藝術家Nicolas Lesaffre創作、4米高嘅Hug the K大型吹氣裝置亦會首次亮相。