新城市廣場單車加「友」站 方便停泊維修

踏入初夏，黛安最想約埋朋友同屋企人一齊去踩單車，公關姊妹報料，新城市廣場最近喺商場1期1樓西翼新設咗「單車加『友』站」，為單車愛好者提供室內免費單車停泊服務，加油站仲有單車DIY維修小工具，方便單車友為輪胎充氣同調校零件等。

公關姊妹話，新城市廣場同香港城市單車生活平台「Bike The Moment」合作，設計咗一條約30公里長嘅「新‧沙田單車路綫」，途經大圍、新翠、車公廟、馬鞍山烏溪沙及泥涌等地點，用2、3個鐘就可以感受到不一樣嘅沙田深度遊，沿途仲可欣賞圍村及廟宇等舊建築，同埋最啱打卡嘅橙色天橋等，好正啊！商場亦同鄰近嘅「龍記單車店」取得獨家優惠，憑新城市廣場任何即日電子消費單據，即可換領「龍記單車」租用全日單車減$20嘅優惠券乙張。