全港22商場合作「唱好香港」 邀市民綫上綫下齊jam歌

聖誕節就快到，由「兒童發展配對基金」舉辦嘅「聖誕頌歌節」，每年都會喺各大商場搞多場表演，為基層青少年籌款。今年嘅主題係「唱好香港為下代頌歌」。黛安知道因為疫情關係，今年無得喺現場表演唱聖誕歌，但係佢哋會喺fb同ig上載頌歌片段，仲會同時代廣場、apm、新城市廣場等港九、新界共22個商場合作，即日起整個12月都會透過各個商場嘅大屏幕，每日繼續喺綫上綫下同大家jam歌呀！

參與演出嘅除咗多名本地著名歌手，以及一早報咗名嘅「頌歌隊」之外，仲有身處外地嘅世界級著名年輕鋼琴家沈靖韜；更加好玩嘅係，大家都可以參加埋一份！只要去番佢哋網頁報名，之後就會有專人通知，然後只要按指示錄低想唱嘅聖誕歌片段，條片就有機會喺22個商場內播放。大會希望今年繼續將聖誕嘅歡樂同祝福帶畀全港市民，一齊迎接2021年，活動咁有意義，黛安都要快啲同朋友夾時間錄番首聖誕歌先得！