長江集團捐助公益金 21度蟬聯籌款前3名

古語有云︰為善最樂，黛安知道，今年疫情下長江集團仍積極捐助香港公益金，支持各項慈善籌款活動，今年更榮膺公益金年度最高籌款機構第三名，更係第21度蟬聯三大最高籌款機構之一，認真抵讚！

長江集團自1999年起與公益金合作無間，20多年來透過不同嘅籌款活動，以等額配對公眾捐款嘅形式捐助公益金。因應疫情嚴重影響社會經濟及市民生計，「長江捐款熱綫」今年6月第15次啟動，為公益金新設嘅「公益金及時抗疫基金」籌款，再次用「你捐幾多，長江集團捐幾多」嘅配對贊助形式，只要公眾經長江捐款熱綫認捐幾多，長江就捐出相同金額，令善款倍增。善款最終用以支援因疫情而遭受突變嘅個人或家庭，包括從事酒店、旅遊、餐飲、運輸及零售業僱員，以及須接受檢疫隔離而影響生計嘅香港居民。