重遇故人的感動

細個嘅時候，爸爸時時帶我去幫襯屋企附近一條巷仔內嘅一個水果檔。賣水果嘅老闆，係一個唔多說話嘅老實人，我爸爸特別喜歡去佢度買水果。

上星期尾，我揸住架車兜嚟兜去，無意中兜咗去兒時嗰條巷仔，見到喺條巷仔中間有一個水果檔，心諗︰會唔會係40幾年前，我爸爸時時帶住我去幫襯嘅嗰位水果叔叔呢？結果……真係佢！佢已經由我細個見嘅叔叔，變成伯伯，我都已經由嗰個 (口靚)妹變咗大媽。

但眼前嗰一刻，我竟然好似企喺個時光機，畫面返咗去我大約10歲嘅情景。我內心既激動又感動，劈頭第一句就同水果「叔叔」講︰「我好開心見到你呀！我細細個爸爸時時帶我嚟買水果㗎！」當時對眼激動到紅晒，希望無嚇親水果叔叔啦。

水果叔叔依然係同以前一樣咁老實。你可能質疑何以見得？我每日都要買橙榨橙汁飲，去親超市或街市買橙要18至20蚊左右先得3個橙，我見到佢個紙皮箱寫住10蚊3個橙，我如獲至寶，佢仲要同我講箱中嘅橙唔夠靚，佢再喺另外個箱度幫我揀啲再靚啲嘅橙。

我感動到不得了，亦感激到不得了。再買多兩個木瓜加半斤車厘子、一抽蒜頭連埋6個橙，總共係50大元，抵到喊。不過最令我想喊嘅，就係當我見番同一景物、同一人物，我特別掛住我爸爸。嗰刻爸爸好似離我好遠，但又好似同我好親近，呢個feeling已經好耐無感受過了。時光一去不復返，但原來好多事嘅點點滴滴，都不知不覺間深深咁藏喺我哋記憶中。每次回憶我嘅童年，都令自己心中感到溫暖。

當一個人開始鍾意懷緬過去，想唔認自己年紀大都唔得囉。我特別鍾意同老朋友相聚，因為大家都可以一齊進入同一個時光隧道，一齊去感受嗰份情懷……

（本欄逢周四刊登）