9000蚊的抉擇

難得限聚令放鬆到8個人，幾個月無見的朋友即刻約個飯局。席間講起最近的生活，前排因為疫情嚴重，很多人都不敢出街買嘢，我都改用網上購物。有朋友則繼續去超市，買回來的東西全部要用消毒紙巾抹到乾淨為止。

不過幾位朋友最擔心的就是之後會唔會出現裁員潮。係咪時候積穀防饑，買少兩個手袋呢？May立即搶答︰「唔使驚！我公司已經申請咗『保就業』計劃。」

「保就業」計劃每月補貼公司每名僱員最多9,000蚊人工。9,000蚊說多不多，說少不少，點解唔使驚？May話「保就業」計劃最重要的一點，是公司在接受補貼的期間不能裁員，即是等同公司作出不裁員的承諾，對打工仔來說是一支強心針。

Susan嘆了一口氣︰「唉，我公司好似唔打算參加『保就業』。」

有錢都唔攞？原來而家唔少老闆都心大心細，特別係較有規模嘅公司，擔心畀人話有錢賺仲攞政府錢，完全係捉錯用神。「保就業」計劃看似是補貼企業，實際上係為咗保住成個香港嘅經濟。現代經濟靠消費，唔攞錢，打工仔擔心被炒，大家唔肯使錢，影響消費，進而拖累成個經濟是也！

（本欄逢周一刊登）