時代廣場打造4,000呎糖果樂園 設工作坊DIY棒棒糖

糖果畀人甜蜜同開心嘅感覺，黛安收到風，時代廣場喺下星期三（10日）至7月19日將會打造一個4,000呎糖果樂園，仲有3間糖果期間限定店，出售多達150款糖果，加埋超靚打卡位同工作坊，真係好吸引！

時代廣場嘅「Sweetmania」除咗雲集10幾款夏日必食甜品，包括時代廣場限定純素甜品拼盤同美式Frozen Custard，仲有以糖果為主題嘅打卡位，以及玩「Candy Everywhere」Instagram AR濾鏡，欣賞「手工糖男團」嘅型格Candy Dance。此外，3間特色糖果品牌亦會喺2樓中庭開設期間限定店，包括Mr Simms、Hey Candy同Jelly Belly®，仲可以免費試食㖭！黛安知道，唔少家長都鍾意帶小朋友參加工作坊，時代廣場「Sweetmania」就啱晒！因為喺指定嘅周末將會舉行手工糖工作坊，大小朋友可以齊齊享受DIY自家棒棒糖樂趣，大家記得去睇下喇。