7-Eleven成功籌集逾45萬張飯券 超標6倍完成

新冠肺炎疫情持續幾個月，大家都面對前所未見嘅困難，有件事令黛安好感動，就係喺疫境下香港人依然樂於助人！好似最近7-Eleven推出嘅「同心互助」飯券認捐活動，推出短短一星期，已成功籌集超過45萬張飯券，數量係佢哋原定目標嘅6倍以上！

黛安知道，唔少基層市民喺疫情下面對減薪甚至失業，今次7-Eleven嘅「同心互助」飯券活動就透過不同機構幫助有需要人士，為佢哋送上溫飽。

公關姊妹話，上星期一（20日）推出活動後，反應非常熱烈，至今已籌到逾45萬張飯券，呢個活動今日早上7時就圓滿結束喇。佢哋會將飯券由5月11日起，盡快透過5間受惠機構陸續送到有需要人士手上。活動結束後，捐贈者仍可上網（https://csr.711campaign.com/）登記選擇想捐贈嘅受惠機構及分配飯券；如果捐贈者無登記，7-Eleven就會將飯券平均分配予5間受惠機構。