「自閉症關注周」助大眾關注與了解

每年4月2日為「世界自閉症關注日」，有自閉症兒童嘅家長為照顧患該症嘅孩子，需面對好多困難同挑戰，包括公眾未必了解自閉症小朋友。黛安知道，協康會趁4月首個星期嘅「自閉症關注周」，展開一系列公眾宣傳活動，等大家可以從中增加對呢啲小朋友嘅了解同接納。

美國疾病控制及預防中心上月底公布最新數據發現，每54個兒童中就有一人患自閉症，數據更有持續增長趨勢，情況絕對值得關注！協康會「自閉症關注周」就特別透過以玩具為主題嘅平面廣告，向公眾展示自閉症人士特徵，好似「嘈吵的小鴨」、「直綫排列的同色積木」、「拒絕直視的玩具熊」等，象徵佢哋社交困難、固執同情緒行為嘅特質，等大家多啲了解佢哋，減少於公眾場所投放奇怪目光，令家長更勇敢面對社區。