3位HKDI畢業生 獲2019「DFA香港青年設計才俊獎」

彈丸之地嘅香港人才輩出，好似3位香港知專設計學院（HKDI）嘅畢業生，憑創意嘅時裝設計，分別奪得由香港設計中心頒發嘅3個大獎，合共獲得超過100萬元獎學金，將到海外深造同實習。

黛安聽學院講，3位得獎者嘅設計水準相當高，其中HKDI時裝設計男裝高級文憑畢業生蘇進傑，就憑作品《覺醒》（Awakening）攞到「香港知專設計學院青年設計才俊獎」。Joseph話，讀HKDI課程前曾經喺洋服店工作，體會到洋服店老師傅對西裝細節嘅執着，佢個得獎作品就係以自身追尋夢想嘅故事做主題，佢會利用獎學金到英國跟當地著名西服大師學習。

HKDI時裝設計高級文憑畢業生Shahrukh KHAN，就以女裝系列《Blossom》，奪得「DFA創意智優青年設計才俊特別獎」；同為HKDI時裝設計高級文憑畢業生嘅冼美玉，就獲得「在職設計師組別」下嘅「DFA創意智優青年設計才俊獎」。