清潔小巴的士 物資捐贈湖北 中港抗疫 恒基出錢出力

香港好多熱心善長都關注新冠肺炎疫情發展，黛安聽公關姊妹講，恒基兆業集團主席李家傑博士同李家誠先生早前透過家族捐款，設立咗「抗疫基金」，喺香港同內地同時推出連串抗疫行動。

基金噚日宣布，將全額資助公共交通工具免費噴塗能長效消毒納米光觸媒，幫車輛消除病毒。考慮到小巴係唔少人嘅日常交通工具，所以優先安排幫全港4,350多輛小巴噴塗，最快喺今個星期可開展工序。基金亦計劃向全港超過18,000部的士免費派發納米光觸媒噴劑，用嚟消毒車廂，與大家一起抗疫。

內地方面，基金將斥資買20萬劑「清肺排毒湯」中藥配方顆粒沖劑，捐畀湖北省內19間醫院嘅26,000名新冠肺炎病人，希望幫佢哋加速康復。同時為醫護人員購買22.5萬樽維生素C同46萬支能量棒，捐畀湖北省31間醫院及保健所等，及24所衞生防控機構，供超過15萬醫護人員使用。

李家傑博士話，過去兩星期動員唔少人力物力，了解本港同內地機構所需物資和援助。今次行動係一個開始，會時刻留意疫情發展和社會需要，希望大家盡快重過健康生活！