陪老友記睇懷舊展覽 抗抑鬱減退化

好多老人家都鍾意懷舊，黛安知道，透過懷舊物件、昔日擺設嘅「緬懷治療」，其實可以令長者有系統地重塑經歷，對於「老人抑鬱症」仲有一定幫助！KCP九龍城廣場現時就有一個「全齡‧傳承‧擁抱愛」主題展覽，大家可以帶家中老友記去睇下，回味下昔日情懷！

其實唔少長者都要人關心，據衞生署2017年嘅調查，香港平均10位長者當中，就有1位出現抑鬱徵狀，60歲以上長者嘅腦退化比例亦一樣，好值得關注。社會與人類行為科學系哲學博士徐香蘭同黛安分享，唔少腦退化患者只記得多年前嘅往事，對近日發生嘅事反而無印象，其實當中同個人生命歷程有關，所以除咗傳統藥物治療外，「緬懷治療」亦係一個好選擇，透過舊物令佢哋緬懷並重塑經歷，將過去負面經驗重新定位，產生正能量，減少抑鬱情緒。

黛安知道KCP九龍城廣場就搞咗個4米高嘅「龍城國際大戲院」，將懷舊電影院、舊報攤、木頭車仔檔等場景還原出嚟，仲設咗7大電影戲院主題展區，例如「超等迷你戲院放映室」、「票房大堂」，場內仲有炒栗子、涼果等經典老香港戲院零食！早排亦舉辦咗「光影懷舊之旅」導賞團，帶一眾長者、學生參觀，相信呢啲裝置都勾起唔少長者以前睇戲嘅歡樂時光，絕對有助同抑鬱思想抗衡！

呢個主題展覽由即日起至2月23日舉行，除咗可重溫當年情，仲可以去埋「香江光影照相館」免費試穿懷舊服裝，影番幾張懷舊靚相。