兩招防病強身

2020年嘅過年氣氛，係我認為最無氣氛嘅一年！原本年廿九約了朋友搭高鐵，到廣州和一大班朋友吃團年飯，結果梗係唔敢去啦。呢個時候畀人知道你坐過高鐵，係人都怕咗你。

呢個非常時期，大家都變成驚弓之鳥。只要你無戴口罩，如果打個乞嗤，附近人肯定即刻九秒九彈開，兼用最厭惡嘅眼神睥住你。所以如果無囗罩，真係最好唔好出街。

話時話，雖然我有戴口罩，但我發覺原來一直戴錯。大吉利市如果之前我接觸疫症病人，就算我戴住囗罩，都應該難逃厄運。

原來戴口罩一定要將面包到實一實，尤其係鼻哥位置要握貼個面，唔好畀空氣入到去，我就係蠢到以為畀少少空間我唞氣，真係戴咗等於無戴！各位朋友切記要學識點樣正確佩戴了，因為口罩真係好矜貴，千祈唔好辛苦撲到囗罩結果得個桔，戴咗都中招，真係喊都無謂。

除咗呢個武漢疫症猖獗之外，流感都係高峰期。喺呢個時候，最好唔好感冒，因為周圍嘅人真係會怕咗你，但如果屋企真係有人感冒，點樣自保呢？以下係我親身試過嘅方法，至少喺我身上發揮作用。

真實個案1︰我十幾年前去上海，同房女友人超級大感冒，大家住埋一間房，我又無得買藥。間房只有水果盆，我惟有不停食橙，結果我係吉人天相無中招。所以補充多啲維他命C，應該有用。

真實個案2︰幾年前我的枕邊人超級大感冒，大家同床，極高危。於是我喺每個角落放一個切咗頭嘅洋蔥，我床頭仲放兩個。雖然有實驗證明室內放置洋蔥一段時間後，細菌數量依然沒有減少、實驗結論認為洋蔥對病毒沒有抑制作用，但我真係無被感染到，不過係好多年前嘅感冒菌。今時今日嘅惡菌，惟有大家要做足所有衞生措施，做足好過做漏先嚟自求多福！

（本欄逢周四刊登）