慶祝「米奇年」 香港迪士尼推全新主題美食

鼠年眨眼就到喇，公關姊妹提醒黛安，今年係「米奇年」，作為鼠年主角，香港迪士尼當然都有準備連串慶祝活動，包括打造一系列超過40款以米奇做主題嘅美食，款款賣相都好吸引，等賓客不論喺樂園定度假區內3間酒店，都可飽嘗口福！

香港迪士尼向來擅長「用食物去說故事」，當然唔會錯過「米奇年」呢個特別年份，公關姊姊分享，過去一年兩間提供自助餐嘅酒店餐廳，一共賣出超過1.7萬個迪士尼主題特色蛋糕，其中以米奇為主題嘅蛋糕佔近一半，即賣出約8,200件。所以今年會更加努力，推出更多以米奇為主題嘅餐飲美食，再次將故事帶到大家眼前，令大家未食先要打卡！

例如黛安見到用米奇造型設計嘅糖醋咕嚕豆腐、南瓜火雞凍批、蕃薯薑味果凍等小食甜品；仲有夏威夷薄餅套餐同砂窩南瓜味菜素肉餅飯等主食，全部都以明顯嘅米奇外形呈現，睇落去已好可愛，最啱鍾意打卡嘅各位姊妹啦。

另外，園內3間酒店亦有全新嘅新春主題套餐，好似迪士尼好萊塢酒店影廠酒廊嘅「風生水起（撈起）」、迪士尼探索家度假酒店芊彩餐廳嘅「金銀滿屋」，以及香港迪士尼樂園酒店晶荷軒嘅「金玉滿堂晚市套餐」等，各有特色；如果有興趣，仲可以去參加煮食班，齊齊喺大廚指導下，親自製作有米奇主題特色嘅杯子蛋糕、薄餅等，大人細路都啱玩。