上廣州食好嘢

上星期又去咗廣州。有高鐵真方便。喺廣州，無朋友都唔緊要，只要智能手機內有「大眾點評App」，節目依然可以好精采。隨便check下附近邊度有採耳、按摩、食嘢……無錢食平啲，有錢就食豪啲，豐儉由人，自己一個人都可以好enjoy！

最幸福梗係當地有朋友啦！廣州朋友好客，吃喝玩樂有佢哋安排，仲要全包，好happy，繼上次採耳爽到反眼，今次就食到我反肚！中午出發坐高鐵，已經唔食午餐，特登留番多啲空間裝食物，原來都唔夠。應該前一晚晚飯都唔食，咁先可以再食多啲。

到達廣州大約三點，姊妹團最好嘅集合地方，梗係先去high tea，朋友訂了康萊德Conrad Hotel歎一個養眼精美珠寶盒裝糕點的下午茶。呢度絕對係一個打卡勝地，地方靚，兼有好多着到有型有款嘅網紅擺晒甫士影相。如果你係單身男人，都可以嚟眼睛食下冰淇淋，秀色可餐。各人口味不同，睇靚嘢，呢度係不錯嘅選擇。不過，如果你真係好鍾意食美味甜品，咁我就要有請鮑師傅。

鮑才勝係「鮑師傅糕點」的始創人，2004年喺北京開第一間麵包店，用自己姓氏創立咗鮑師傅呢個品牌。佢用傳統中國糕點結合西式口味，經網紅煲一煲立即火紅。去「鮑師傅」度買糕點，閒閒哋要排半個鐘，對我呢個懶人嚟講，就唔使預我喇。好彩朋友好客，一早買定畀我哋試，絕對可以坐享其成。喺內地有好多假嘅「鮑師傅」，亦有好多真嘅「鮑師傅」加盟店；一句講晒，真嘅鮑師傅應該已經由發麵粉到今日發咗達。

我食嘅係佢哋招牌出品之一「肉鬆小貝」。肉鬆包內藏秘製沙律醬，混合埋一齊後味道頗特別。店內仲有好多其他款糕點，你有機會可以慢慢試。

喺2020年，當人人食糕點時，我都希望好似鮑師傅一样咁食腦，咁就發達囉！

（本欄逢周四刊登）