德福新春賀年市集 消費千元抽大利市

今個月25日就係大年初一，大家又係時候辦年貨喇！黛安又有好介紹，就係港鐵旗下嘅德福廣場喺今個月10日至23日，將會舉行「食德是福」新春賀年市集，唔單只滙聚多間本港老字號同特色食品攤檔，仲有「即抽即中大利市」活動！

黛安聽公關姊妹講，「食德是福」市集有11間香港老字號同特色食品攤檔，售賣逾百款賀年禮品同懷舊小食，包括上海陸金記瓜子大王、恆香老餅家同提供優質海味、鮑魚嘅永泰海味街，仲有利苑招牌棗皇糕等，參展商更會提供唔同折扣優惠。

過年氣氛同意頭最緊要，德福廣場內就設有13呎高桃花王，同直徑近12呎嘅巨型雙層全盒；另外，本月3日至2月14日，場內仲會推出「即抽即中大利市」推廣活動，喺推廣期內單一消費滿1,000元即可參加抽獎，有機會獲得500元商場現金券，獎品總值超過100萬港元㗎！大家快啲去掃貨啦。