643人學跳拉丁舞 創健力士紀錄

香港人生活緊張，有時候跳下舞都係紓壓方法。由GP33 Holdings Limited主辦、Step Up Studio呈獻嘅「千顆童心舞動奇迹」，噚日就喺尖沙咀市政局百周年紀念花園舉行，仲創下健力士紀錄，非常威水！

噚日有近千來自唔同國家同背景嘅大人小朋友，同率先準備好舞蹈嘅舞者，喺專業拉丁舞冠軍級導師梁嘉欣等人帶領下，用咗30分鐘學跳拉丁舞，之後喺亞洲企業家教練鄭海名、大會主席林偉深同健力士專員見證下，用3分鐘時間一齊跳出拉丁舞。最後健力士專員Mr Jelinek確認，創下最多人學跳拉丁舞嘅健力士紀錄，總數達643人！

今次活動除咗破紀錄外，仲為國內山區「廣西省梧州市藤縣新慶鎮思亥建新小學」重建工程募款，活動收益扣除開支後，會全數捐作小學校舍重建之用。