太古藝術月月中登場 欣賞國際創新設計

嚟緊3月中開始就係太古地產藝術月，黛安知道今年佢哋挑選咗好多國際享負盛名嘅藝術家，一齊打造精采節目，畀大家體驗同發掘新創意。

第一個登場嘅係，由三藩市藝術團隊FoldHaus帶來嘅巨型互動藝術裝置LUMENous GARDEN，聽公關姊妹講，係團隊第一次將美國內華達州嘅藝術盛大節慶「火人祭」（Burning Man）大型作品帶來香港。兩件作品分別係大型蘑菇和花卉裝置，後者只要一靠近就會開合搖曳，大家去太古廣場嘅Garden Court就可以欣賞到。

另外，紐約藝術家Derick Melander，將會利用喺星街小區同太古地產旗下物業收集到嘅超過700磅二手衣物，堆疊成一個藝術裝置，放喺太古廣場三期外，希望喚醒大家對紡織廢料嘅關注。藝術月結束後，全部衣物會捐畀本地慈善機構、重賣或循環再造成新布料！

姊妹仲話，今個月起至4月，藝術月會有多個節目喺太古廣場同太古坊ArtisTree舉辦，包括由法國街頭藝術家L'Atlas，同奧地利藝術家Willi Dorner共同策展嘅Urban Playgrounds，有相睇之餘，仲有表演者喺室內穿梭，非常獨特。而香港會議展覽中心巴塞爾藝術展香港展會，亦會喺今個月舉行，太古已經係第7年同巴塞爾藝術展香港展會合作，今年仲請來倫敦創新設計師Paul Cocksedge，幫太古地產貴賓室嘅設計操刀，名為「Spectrum」，屆時仲會舉辦太古地產Dialogue Series一系列講座同座談會。