留《流浪地球》票尾 85折買原著小說

最近香港有一齣新科幻電影上映，但唔係Marvel唔係史提芬．史匹堡，而係國產電影《流浪地球》。呢齣戲喺內地大受歡迎，截至前日（2日）票房已經超過44億元人民幣，而香港亦都已經喺上星期五正式上映，故事講述太陽即將毀滅，人類為咗生存要捨棄太陽，展開歷時千年嘅「逃亡計劃」，將地球煞停、逃離太陽系，前往鄰近嘅人馬座尋找新太陽。

電影賣座亦帶動小說銷情，黛安聽出版商講，原著小說《流浪地球－劉慈欣中短篇科幻小說選》自2月1日起香港推出繁體版，短短2星期已經重版，依家正急印第4版。出版商亦推出相關優惠，即日起憑《流浪地球》電影票尾，喺今日（4日）起，至17日到三聯書店同中華書局，以及3月11至25日到商務印書館，便可以原價85折優惠購買原著小說。

出版商仲同黛安講，電影裏面未解開嘅謎團，喺原著小說會搵到答案，有興趣嘅讀者記得留意啦！