聖誕情人節浪漫打卡熱點 光影藝術閃耀中環海濱

「打卡」要有新意，求婚示愛就講求誠意，要數最精采同浪漫嘅聖誕及情人節好去處，梗係免費入場去中環海濱睇「閃躍維港燈影節」啦。旅遊發展局總幹事劉鎮漢（Anthony）同節目及旅遊產品拓展總經理洪忠興（Mason）噚日同黛安傾開，佢哋話單計燈影節，料已可吸引50萬人次入場。

旅發局今個燈影節，原來投放咗成2,300萬元，連同「藍光冰雪版」嘅皇后像廣場聖誕樹同「加強版」幻彩詠香江，堪稱歷來最大規模嘅冬日節目組合。Mason話，燈影節展出嘅18件國際同本地藝術家作品，影得又玩得，重點推介包括用重金屬音樂賀聖誕嘅「魔方樹」，夠潮夠cult；而嚟自匈牙利嘅Talking Heads，就識得同訪客互動「變樣」；至於對體力有信心嘅，就可踏下「LightbattleＸ」單車，鬥快「踩爆燈」攞聖誕頭彩。

為加強互動感，Anthony就講到明唔會「圍住晒」啲展品，但望觀眾「輕手啲」，珍惜難得嘅藝術體驗。黛安聽佢講，香港燈飾一向浪漫，「用嚟求婚實成功」，原來過往旅發局亦真係有幫手求過婚，今次燈影節橫跨情人節，話唔定可促成更多良緣。