利園三期開幕 主打生活品味環保設計

希慎興業旗下嘅利園三期，噚日正式開幕，利氏家族四代同堂出席開幕禮，齊齊力撑家族嘅新里程碑。連久未露面嘅利孝和夫人都有出席，93歲高齡依然精神奕奕同黛安打招呼，黛安都覺得好開心呀！

希慎主席利蘊蓮致辭話，利氏家族喺95年前買咗利園山土地，發展做而家嘅利園區，今年利園三期落成係發展嘅最新里程碑，希望可以提供更多豐富嘅品味生活體驗畀大家。

今次利園三期引入咗超過20間以生活品味做主題嘅舖頭，好似首度來港開業嘅Next Door Café & Bar家具概念店、東京表參道嘅人氣梳乎厘班戟店幸せのパンケーキ（A Happy Pancake）同丹麥設計名牌BoConcept等，包保大家行街街都夠晒國際化。新建築都好重視環保設計，包括用天然採光、垂直草牆同綠化天台花園，令客人分分秒秒都感受到大自然，兼附設高速Wi-Fi系統，最啱新世代文青消磨時間啦。