奧比斯懷舊「盲俠行」 籌款$420萬

大家平時行山行得多，但有無試過邊行邊籌款？前晚係一年一度嘅通宵夜行盛會、奧比斯「盲俠行」舉辦嘅大日子，共吸引逾4,300名「盲俠」熱心參與。今年仲特別加插懷舊主題，唔少人齊齊着上波點、格仔恤衫、復古衫裙等，浩浩蕩蕩由沙田運動場出發行到大尾督，齊捱通宵、話當年，盡興之餘，更成功籌得善款近420萬元，為更多視障患者帶來復明機會。

黛安知道，嗰晚數以千計嘅「盲俠」齊齊將自己打扮成70、80年代嘅少男、少女，現場仲有昔日士多辦館、廣東話霓虹燈箱等，好有特色；全長20公里路程上，仲有唔少配備咗充滿童年回憶嘅食物同好玩小遊戲嘅打氣站。而今年繼續有蒙眼夜行挑戰同光影塗鴉，起步禮上，由全場所有參加者用光影塗鴉畫出千個「光明月亮」，每人一路行嘅途中，仲要分別接受2次維持10分鐘嘅蒙眼步行挑戰，體驗當失去視力時所感受到嘅惶恐同不安，非常有意思！