玩轉影像萬花筒 海港城浪漫過聖誕

黛安每年聖誕必去嘅打卡熱點就係海港城，明天（13日）正式亮燈啦！聽公關姊妹講，今年有好多話題景點，包括全球最大嘅三角鏡影像萬花筒，大家可走入秘境慢慢影。

聖誕影像萬花筒位於海運大廈2樓正門入口，喺今個星期三（14日）至明年1月1日期間，只要捐50元去「香港血癌基金」，就可以任影啦！每節10分鐘左右，一共有6幕唔同場景，包括雪花、聖誕樹、閃星星、彩虹隧道等，一定非常「igable」！

而每年盛事嘅亮燈儀式會喺星期二黃昏舉行。黛安知道，今年會以「Christmas Treasures」尋找聖誕瑰寶做主題，打造5大浪漫打卡熱點，星期三起就開放畀公眾啦！黛安最期待嘅一定係長超過40米嘅聖誕大橋，同60呎高巨型戶外聖誕樹，用咗電腦燈飾同近10萬顆LED燈，打出bling bling燈光，再配以原創聖誕音樂，定時上演「聖誕音樂燈光表演」。

如果想同情人留下美麗回憶，就一定要去「愛心鎖橋」，現場會慈善義賣9款唔同寓意嘅「Love Lock」，大家可以揀選鍾意嘅款式，再喺橋上許願同扣上，好浪漫啊。聖誕橋下仲有聖誕郵局「XMAS POST」，只要捐款就可即影即印專屬明信片，仲免費幫大家寄出，無論摯愛身處邊度，都一定會收到充滿愛嘅祝福。