榮華慈善基金 送長者5萬部智能血壓計

香港開始步入老人社會，按2016年統計，現時每6位港人之中就有1位長者，黛安收到風，榮華慈善基金會明年起推出「榮華智能血壓計送贈計劃」，向合資格長者送出5萬部家用智能藍牙手臂式血壓計。

計劃噚日就舉行咗送贈儀式，出席嘉賓位位都係猛人，包括全國人大常委譚耀宗、勞工及福利局副局長徐英偉等，大家噚日仲即場介紹及示範操作。榮華慈善基金董事局主席楊榮華就話，長者容易有血壓問題，經常量血壓，隨時注意血壓變化，就可以有效防範心血管疾病發生，所以基金特別推出計劃，希望大家都養成量血壓嘅習慣。想申請嘅話，一定要年滿60歲或以上，有領取綜援或者長者生活津貼，又或住喺公屋嘅獨居長者、雙老家庭或其他有需要人士都可以，即日起接受申請，明年1月至2021年12月底就可以拎到。