美酒佳餚巡禮 10周年創10大之最

一年一度嘅「香港美酒佳餚巡邏」圓滿落幕，適逢今年活動係10周年，黛安知道創咗「10大之最」，例如規模同攤位都係歷來最大同最多，又新設咗唔少新展區等，實在非常成功！

為咗慶祝「美酒佳餚」10歲生日，聽旅發局姊妹講，今次活動真係傾盡全力，仲專誠準備咗唔少新意送畀大家，真係啱啱好有10樣特色，非常貼題。其中好似今次規模係歷屆最大，總面積達4.9公頃，比舊年大咗足足2成，場地仲延伸到金鐘添馬公園，有多達450個參展攤位參加，仲首設多項電子支付方法，方便大家。

而參展區入面，仲首設咗咖啡園同環球街頭小吃區，藝人陳豪同何超蓮都各自帶咗自己品牌嚟參加，除咗有陳豪不定時出現為大家親手沖咖啡之外，連特首林鄭月娥都專登去咗超蓮個攤位度品嘗涼麵，真係星光熠熠！

話明慶祝10周年，又點少得禮物同蛋糕？旅發局今次亦為呢個派對首設咗一個7米高大型生日蛋糕打卡位，兼每晚定期進行大抽獎，送出總值超過170萬嘅獎品，仲首次喺維港上演無人機表演，雖然最終因外來干擾影響之後幾日表演，但一樣夠晒豐富！

黛安仲知道，今年一連4日嘅總參與人數有成16.8萬人，比舊年足足升咗18%，其中參與旅客佔咗近2萬人，同樣升咗20%，兩者同屬歷年之冠，果然十全十美，值得恭喜，希望旅發局下年繼續努力！