前財爺歌神齊拍MV 賀英華創校200周年

英華書院為慶祝創校200周年，噚日請嚟一眾「英華仔」校友，星光熠熠，包括「歌神」許冠傑、南豐集團董事長及行政總裁梁錦松等，齊齊粉墨登場，夠晒台型啊！

噚日一班大師兄着番套校服，一齊錄製MV《天地人》，相信大家都好懷念青春歲月。

聽公關姊妹講，今次嘅歌曲，特別由校友許冠傑同著名填詞人周耀輝破天荒合作。校長鄭鈞傑話，其實佢係聽Sam師兄金曲長大，一問之下Sam就即刻答應為母校作曲，之後諗應該由邊個作詞呢？於是，就建議周耀輝，佢係著名填詞人，又係英華校友，同阿Sam簡直就係絕配！

今次難得一班校友齊返母校聚舊，大家都傾起年輕時點滴。好似曾經擔任財爺嘅梁錦松，原來中學時，學業成績唔好，唔可以原校升讀中六，但因家境貧窮，又有8兄弟姐妹要養，當年作為老師嘅陳耀南博士，就帶住梁錦松去見校長，畀佢寄居喺學校飯堂嘅空置廚房，方便溫習，經兩年苦讀終於考入港大。

至於阿Sam，就話好記得當年入讀英華時，已經加入成為蓮花樂隊（Lotus）主音歌手，要喺酒店登台，好彩得到當時嘅校長支持，畀佢留住把長髮，邊讀書邊唱歌先成就歌神地位。

黛安仲知道，今個星期五起，英華會同香港歷史博物館合辦歷史展，「英華書院創校二百年歷史展覽-傳道授業在香江」，展出200年來英華書院同漢學西傳、華文教育嘅歷史，亦會喺下個月9日發行「英華書院二百周年校慶郵票小型張」呀！