新世界培育平台選拔再臨 為初創企業提供支援

想創業除咗要有創意，啟動資金同埋支援配套都好緊要。以培育青年企業家為己任、由新世界集團成立嘅初創企業培育平台Eureka Nova，繼舊年為超過60間初創企業提供支援後，今年嘅選拔都已經開始咗啦！公關姊妹話，今年嘅主題係「智慧零售」，選拔範圍會仲擴展到粵港澳大灣區，只要營運少於3年、且最少有2個成員係全職嘅初創企業都可以參加；下個月11號就截止啦。

成個孵化課程將會喺明年第一季開始，到時除咗有業內精英同集團領袖做導師，仲會有好多同知名企業合作嘅機會，同埋實踐工作坊參加，直情是步向成功企業嘅「雞精班」。

新世界發展有限公司社會創新主管呂施施都話，而家利用互聯網、物聯網同消費大數據做零售，已經係市場大勢，今年首次同騰訊合作，就係想幫年輕人抓緊大灣區發展機遇。「大灣區人口多達7,000萬人，而且年紀偏年輕，消費力龐大，以大灣區為起點發展潛力無限。」

其實講開新科技，新世界集團都用緊唔少新科技銷售，好似佢哋旗下K11商場，都同AI公司Aibee達成戰略合作，開拓智慧零售商機。想緊貼世界大勢，創意澎湃嘅你就要記得立即參加啦！