氣候變化影響全球 世界氣象組織籲關注

唔少人都關心近年氣候變化，影響大自然環境。「呂志和獎—世界文明獎」昨日響理大搞咗一個講座，邀請咗獲得「人類福祉獎」嘅世界氣象組織（WMO）秘書長佩特里‧塔拉斯主講氣候變化影響，黛安都有去聽，原來單計今年上半年，破紀錄嘅高溫、暴雨等極端天氣已不停侵襲北半球，唔止影響農業，仲對生態系統同基建造成咗嚴重損害。

黛安諗起之前「山竹」襲港搞到全城都心驚，塔拉斯教授仲警告因海水同大氣溫度愈嚟愈高，未來更強烈風暴吹襲各地機會都會大咗！

不過，想要減低損失，都唔係無可能。塔拉斯教授話加強早期預報系統，同建立更簡單易用嘅氣候服務都好重要。

同場嘅理大校長唐偉章都話，相信只要全球社會群策群力，一定可以鞏固大家嘅抗逆能耐。