數碼視像平台 使用時間倍增

黛安一向都有睇電視嘅習慣，特別放假，可能全日留喺屋企睇電視，包括免費電視、OTT平台等。黛安之前收到媒體策劃公司Omnicom Media Group Hong Kong同實時消費者資訊及研究科技供應商Toluna，發布一項有關港人收睇視像媒體習慣研究報告，發現觀眾睇數碼視像平台、同社交平台睇片嘅時間都多咗。

調查由2016年4月起分3階段進行，最新階段係今年5至6月訪問1,000人，年齡介乎18至59歲，問佢哋過去一周曾觀看免費電視、收費電視、數碼視像平台。研究發現，一直係免費電視擁躉嘅45至59歲觀眾，每周睇免費電視嘅時數無大變，但睇數碼視像平台嘅時間，就由每周6小時增至14小時，包括YouTube、FOX+、NETFLIX等。

而OTT平台好似NETFLIX、FOX+、HBO GO等，滲透率亦由38%上升至55%，每周觀看時間由2.6小時增至5.5小時。調查又問佢哋最多願意畀幾多錢月費，答案係58元。社交平台方面，有85%話過去7日曾喺社交平台睇片，由第二階段嘅每星期平均睇1.9小時升至2.3小時。